Markaz vakili BMTning yillik raqamli yetakchilar dasturida ishtirok etdi

Ushbu dastur BMTning Osiyo va Tinch okeani iqtisodiy va ijtimoiy komissiyasi (UN ESCAP) ning mintaqaviy instituti boʻlgan Osiyo va Tinch okeani AKT oʻquv markazi (APCICT) tomonidan Koreya Respublikasining Incheon shahri Fan va AKT vazirligi hamda Koreya Respublikasining Incheon Metropolitan shahri bilan hamkorlikda 2024-yilning 13-14-noyabr kunlari tashkil etildi.

Dastur davlatning raqamli transformatsiyasida maʼlumotlarni boshqarishning ahamiyatini oshirishga qaratilgan boʻlib, idoralararo maʼlumotlar almashish kabi dolzarb muammolarni hal etishga yoʻnaltirilgan edi.  Ishtirokchilar sun'iy intellekt asoslari, jumladan, uning iqtisodiy, ijtimoiy va axloqiy taʼsirini oʻrganib, boshqaruv asoslari, standartlari va amalga oshirishning amaliy strategiyalari bilan tanishdilar.  Shuningdek, sun’iy intellekt bilan bog‘liq xavflarni samarali boshqarish va amaliyotni xalqaro standartlarga moslashtirish masalalariga ham e’tibor qaratildi.

Dasturda Xalqaro Valyuta Jamg'armasi va UN ESCAP kabi global tashkilotlarda faoliyat yuritgan Jonatan Palmer va sun'iy intellekt boshqaruvi, kiberxavfsizlik va ISO standartlari boʻyicha ekspert Timoti Tey kabi taniqli ma'ruzachilar ishtirok etdi.

Markaz vakili tadbir doirasida boʻlib oʻtgan davra suhbatlarida Oʻzbekistonda raqamli hukumat sohasida maʼlumotlar va sun'iy intellektni boshqarish borasida amalga oshirilayotgan ishlar bilan oʻrtoqlashdi va boshqa mamlakatlar tajribasini oʻrganish imkoniyatiga ega boʻldi.

Ushbu dastur Oʻzbekiston uchun raqamli transformatsiya jarayonini yanada rivojlantirish,  xalqaro tajribani oʻrganish va  mamlakatimizning raqamli iqtisodiyotni shakllantirishdagi salohiyatini oshirishda muhim ahamiyat kasb etadi.