Ишонч телефони
Товарларнинг экспертиза хулосаси электрон тақдим этилмоқда
Ўзбекистон Республикаси Президентининг 2022 йил 22 августдаги “2022-2023 йилларда ахборот-коммуникация технологиялари соҳасини янги босқичга олиб чиқиш чора-тадбирлари тўғрисида”ги қарори ижросини таъминлаш мақсадида давлат бошқаруви ва иқтисодиётнинг реал сектори тармоқларини, маҳаллий ижро этувчи ҳокимият органларини рақамлаштириш бўйича қатор ишлар амалга оширилмоқда.
Хусусан, Божхона қўмитаси томонидан Божхона омборларида юк операцияларини амалга ошириш жараёнларини рақамлаштириш бўйича ахборот тизими ишлаб чиқилиб, шу кунга қадар унда 368 та божхона омборлари рўйхатдан ўтган.
Мазкур тизим туфайли ташувчиларнинг товарни манзилга етказганини тасдиқлаш учун йўл юк ҳужжатлари билан Ташқи иқтисодий фаолият (ТИФ) божхона постига бориб мурожаат қилиш, шунингдек, етказилган товарни транспортдан тушириш учун Божхона юк декларацияси (БЮД)ни тақдим этиш амалиётлари бекор қилинишига эришилди.
Бундан ташқари, Қўмита томонидан Товарларни божхона экспертизасидан ўтказиш жараёнларини рақамлаштиришга қаратилган “Е-Экспертиза” ахборот тизими синов тариқасида ишга туширилиб, қисқа муддатда 5 мингдан ортиқ товарларнинг экспертиза хулосаларини электрон тақдим этишга муваффақ бўлинди.
Шу билан бирга ушбу ахборот тизими орқали республика ҳудудига жисмоний ва юридик шахслар томонидан олиб кирилаётган товарларни эркин муомалага чиқариш чоғидаги экспертиза хулосаларини тайёрлаш жараёнлари автоматлаштирилиб, ҳозирда уни амалиётга тўлиқ жорий этиш ишлари давом этмоқда.
