Ўзбекистон БМТ Давлат Хизмати Форумига мезбонлик қилмоқда

Форум 23–25 июн кунлари Самарқанд шаҳрида бўлиб ўтади ва Европа, Осиё, Лотин Америкаси ва Африкадан, жумладан Самоа ва Бутан каби кичик давлатлардан рекорд миқдорда вазирлар ва давлат хизматига масъул органлар раҳбарларини бирлаштиради. Шунингдек, халқаро ва минтақавий ташкилотлар, илмий доиралар, фуқаролик жамияти, хусусий сектор вакиллари ва инновация етакчилари ҳам иштирок этмоқда.

 "2030 йилгача беш йил: Барқарор келажак учун давлат хизматларини кўрсатишни жадаллаштириш" мавзусида ўтказилаётган форум дастуридан ялпи мажлислар, мавзули муҳокамалар, стратегик мулоқотлар ва  илғор амалиётлар тақдимоти бўлиб ўтади. Мақсад – глобал муаммолар ва ўзгарувчан шароитларда давлат хизматининг ролини қайта кўриб чиқиш.

Форум БМТ Иқтисодий ва ижтимоий масалалар департаменти (UN DESA), Ўзбекистон Республикаси Рақамли технологиялар вазирлиги, Президент ҳузуридаги Давлат хизматини ривожлантириш агентлиги ва Стратегик ислоҳотлар агентлиги ҳамкорлигида ташкил этилади.

Нима учун бу муҳим?

Бирлашган Миллатлар Ташкилотининг Барқарор ривожланиш мақсадларига эришишига атиги беш йил қолганида, самарали, инклюзив ва инновацион давлат хизматларига бўлган эҳтиёж тобора долзарб бўлиб бормоқда. Рақамлаштириш, ҳамкорлик ва хизматлардан тенг фойдаланишга эришиш ва “сўнгги миля”даги бўшлиқни камайтиришга ёрдам берадиган янги бошқарув ёндашувларидан фойдаланишга алоҳида эътибор қаратилмоқда.

Ўзбекистон мезбон сифатида

БМТ Давлат хизмати форумининг Ўзбекистонда ўтказилиши Президент Шавкат Мирзиёев ташаббуси билан амалга оширилаётган кенг кўламли ва изчил ислоҳотларнинг халқаро миқёсда эътироф этилганидан далолатдир. Улар “Халқ давлат идораларига эмас, давлат идоралари халққа хизмат қилиши керак” деган асосий стратегик тамойилга асосланади. Бундай ёндашув давлат бошқаруви тизимини тубдан ўзгартиришнинг ҳаракатлантирувчи кучига айланди.

Ислоҳотлар доирасида мамлакатимизда замонавий рақамли экотизим яратилди. “Рақамли ҳукумат” идоралараро интеграция платформаси 49 та давлат органларининг 390 дан ортиқ веб-хизматларини амалга оширади, уларга ҳар куни 216 дан ортиқ ахборот тизимлари уланади.

Ягона интерактив давлат хизматлари портали (my.gov.uz) орқали фуқаролар ва тадбиркорлик субектлари 760 дан ортиқ электрон хизматлардан фойдаланиш имкониятига эга бўлиб, рўйхатдан ўтган фойдаланувчилар сони 11 миллиондан ошди.

Қонун ҳужжатлари маълумотлари миллий базасида кенг жамоатчилик ва профессионал ҳуқуқшунослар учун очиқ бўлган сунъий интеллектга асосланган рақамли ёрдамчи муваффақиятли жорий этилди.

Ривожланган 208 та Давлат хизматлари марказлари тармоғи республика бўйлаб маъмурий хизматлардан офлайн режимда фойдаланиш имконини беради.

Эришилган натижаларнинг халқаро эътирофини рейтинглар ҳам тасдиқлайди: 2024-йилда Ўзбекистон биринчи марта Электрон ҳукуматни ривожлантириш рейтингининг “жуда юқори” даражасига эга мамлакатлар гуруҳига кирди ва GovTech етуклик индексида 37 поғонага кўтарилиб, “А” тоифасига кирди.

Рақамли трансформация барча асосий йўналишларни қамраб олади – давлат хизматларидан тортиб электрон молия, финтеч ечимлари, электрон тижорат, фискал маълумотлар таҳлили ва рақамли иқтисодиётнинг бошқа соҳалари.

Бу ютуқлар нафақат рақамли етукликнинг юқори даражасидан, балки Ўзбекистон ўз тўплаган тажрибаси билан ўртоқлашишга тайёрлигидан далолат беради. Мамлакат халқаро, жумладан, Осиё ва Африка давлатлари билан ҳамкорликка очиқ.

 Асосий йўналишлар

Форум расмий равишда бугун, 23 июн – БМТ Давлат хизмати куни очилди. Муҳим мавзулар:

• Давлат бошқарувида инновациялар: самарадорлик, шаффофлик ва ҳисобдорликни оширишда рақамли воситалар ва сунъий интеллект роли;
• "Сўнгги миля"га эришиш: барча аҳолига хизматларни кенгайтириш бўйича халқаро тажриба;
• Ислоҳотларни тезлаштириш: инновацион лабораториялар орқали бошқарувни трансформация қилиш.

 Махсус тадбирлар

• Рақамли бошқарув, барқарор ривожланиш ва сунъий интеллект бўйича экспертлар билан ялпи мажлислар;
• Давлат бошқаруви ва маълумотлар билан ишлаш бўйича интерактив семинарлар;
• UN DESA томонидан электрон ҳукумат соҳасидаги ютуқлари учун 12 давлатни тақдирлаш маросими;
• Ўзбекистоннинг илғор рақамлаштириш лойиҳалари билан таништирувчи ташрифлар.

Кутилаётган натижалар

Форумда халқаро ҳамкорликни мустаҳкамлаш, айниқса ривожланаётган давлатлар ўртасида тажриба алмашиш ҳамда давлат хизматларидан тенг ва адолатли фойдаланишни рағбатлантиришга қаратилган Самарқанд вазирлар декларацияси муҳокама қилинади.

Шунингдек, рақамли давлат бошқаруви (GovTech) соҳасида ечимлар экспортини қўллаб-қувватлаш ва рағбатлантиришга қаратилган дастурни ишга тушириш режалаштирилган.

БМТ Давлат Хизмати Форуми ҳақида

Форум 2003 йилдан буён ўтказиб келинмоқда ва унга аввалроқ АҚШ, Австрия, Испания, Танзания, Баҳрайн, Марокаш, Колумбия, Озарбайжон (2019) ва Корея Республикаси (2024) каби давлатлар мезбонлик қилган. Самарқанд келгусида самарали давлат бошқаруви бўйича навбатдаги халқаро мулоқот майдонига айланади.